ໃນວັນທີ 22 ພຶດສະພາ 2026 ນີ້, ທີ່ສູນກາງແນວລາວສ້າງຊາດ, ໄດ້ມີພິທີມອບ-ຮັບເຄື່ອງອຸປະຖໍາເປັນອຸປະກອນເຄື່ອງໃຊ້ຫ້ອງການ ຊຸກຍູ້ວຽກງານຕ່າງໆຂອງສູນກາງແນວລາວສ້າງຊາດ ກໍຄື ກົມສາສະໜາ ຈາກກໍາມາທິການເຜີຍແຜ່ສີນລະທໍາ ແລະ ປະຕິບັດກໍາມະຖານ ສູນກາງອົງການພຸດທະສາສະໜາສໍາພັນລາວ ຮ່ວມກັບ ກໍາມາທິການສາທາລະນຸປະການ ສູນກາງອົງການພຸດທະສາສະໜາສໍາພັນລາວ ໃຫ້ກຽດມອບໂດຍ ພຣະອານຈານ ສີທົນ ໄຊຍະວົງສອນ ຮອງປະທານສູນກາງ ອພສ ຫົວໜ້າກໍາມາທິການເຜີຍແຜ່ສີນລະທໍາ ແລະ ປະຕິບັດກໍາມະຖານ ສູນກາງ ອພສ ແລະ ພຮະອາຈານໃຫຍ່ ພົງສະຫວັນ ອານຸສິນ ຮອງຫົວໜ້າກໍາມາທິການສາທານຸປະການສູນກາງ ເປັນກຽດກ່າວຮັບໂດຍ ທ່ານ ນາງ ບຸດສະດີ ທະນະເມືອງ ກໍາມະການສູນກາງພັກ, ຮອງປະທານສູນກາງແນວລາວສ້າງຊາດ ພ້ອມດ້ວຍຄະນະ ແລະ ພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ເຄື່ອງທີ່ນໍາມາມອບໃນຄັ້ງນີ້ ປະກອບມີ: ຈັກກ໊ອບປີ້ເອກະສານ ຈໍານວນ 1 ເຄື່ອງ ແລະ ຄອມພິວເຕີໂນດບຸດ ຈໍານວນ 4 ເຄື່ອງ ລວມທັງໝົດເປັນມູນຄ່າ 100,000,000 ກີບ (ໜຶ່ງຮ້ອຍລ້ານກີບ) ເຊິ່ງເຄື່ອງດັ່ງກ່າວແມ່ນໄດ້ມາຈາກການປະກອບສ່ວນຂອງພຣະອາຈານ ແລະ ອອກຕົນຍາດໂຍມ ທີ່ມີໃຈສັດທາເຫັນໄດ້ຄວາມສໍາຄັນຂອງການເຄື່ອນໄຫວວຽກງານຂອງຄະນະກໍາມະການສູນກາງແນວລາວສ້າງຊາດ.
ໂອກາດນີ້, ທ່ານ ຮອງປະທານສູນກາງແນວລາວສ້າງຊາດ ໄດ້ກ່າວສະແດງຄວາມຮູ້ບຸນຄຸນ, ຂອບໃຈ ແລະ ຍ້ອງຍໍຊົມເຊີຍເປັນຢ່າງຍິ່ງ ມາຍັງພຣະອາຈານໃຫຍ່ທີ່ໄດ້ປຸກລະດົມຂົນຂວາຍແຮງສັດທາຈາກສາສະນິກະຊົນນໍາເອົາເຄື່ອງໃຊ້ຫ້ອງການມາມອບໃຫ້ສູນກາງແນວລາວສ້າງຊາດ ແລະ ຈະນໍາເອົາເຄື່ອງດັ່ງກ່າວໄປໝູນໃຊ້ເຂົ້າໃນວຽກງານຕົວຈິງໃຫ້ເກີດຜົນປະໂຫຍດສູງສຸດ.